Kultura  Urduliz 2018-07-11 11:37

Urdulizko nekazaritza-azokan txosna ipintzeko baimena eska daiteke

Datorren abuztuaren 25ean, zapatuan, nekazaritza-azoka izango da Urdulizen, Udalak eta BBK-k antolatuta. Ohi legez, baserritarrek bertako produktuen lehiaketa, erakusketa eta salmenta egingo dute. Modu berean, ekoizleek hainbat txosna ipiniko dute. Txosna horien baldintzak arautu ditu Udalak.

Urdulizko nekazaritza-azokan txosna ipintzeko baimena eska daiteke
Nekazaritza-azoka bat, artxiboko irudian. | Ikusi handiago | Argazki originala

Txosna eskatzeko aukera izango dute "ekoizpen propioko txerrikiak edo sagardo edo txakolin edo ekoizpen propioko irinekin egindako taloa salduko dutenek", Javier Bilbao Lopategi alkateak sinatutako dekretuan jaso dutenez.

Eskaerak uztailaren 20a baino lehen aurkeztu beharko dituzte udaletxean, honako agiriakaz batera:

  • Eskatzailearen NANaren fotokopia.
  • Nekazaritzako ustiategiak Bizkaiko Lurralde Historikoko Nekazaritzako Ustiategien Erregistroan duen inskripzio-zenbakia.
  • Indarrean dagoen osasun-erregistroa.
  • Jarduera Ekonomikoen Zergaren alta hartuta egotea eta zerga ordainduta izanaren egiaztagiria.
  • Gizarte Segurantzaren araubidean alta hartuta egotea eta kuota ordainduta izanaren egiaztagiria.
  • Elikagaien manipulatzaile-txartela edo osasun-prestakuntzaren ziurtagiria.
  • Erantzukizun zibileko aseguruaren poliza eta indarrean dagoen ordainagiria.
  • Produktuen jatorria identifikatzeko eta bermatzeko agiriak.

Hiru txosna

Gehienez, hiru txosna baimenduko ditu Urdulizko Udalak. Hala, eskaera gehiago aurkeztuko balira, Alkatetzak hiru baimenak zozkatuko lituzke betekizunak betetzen dituzten eskatzaileen artean. Hala, emaitza alkateak ebatziko du. Horiek Udalak aldez aurretik zehaztuko dituen lekuetan kokatu beharko dituzte txosnak.

Gainera, Udalak gogorarazi duenez, txosnek "pertsonen eta ondasunen segurtasuna bermatzeko eta hirugarrenei eragozpenik ez eragiteko beharrezko baldintza teknikoak bete" beharko dituzte, "kasu bakoitzean indarrean dagoen araudiaren arabera, batez ere, sendotasun, egituren funtzionamendu, suteen kontrako prebentzio eta babes neurriei dagokienez, baita osasun eta higiene egoerari dagokionez ere".

Hala, txosnak ireki aurretik, erantzukizun zibileko asegurua izan beharko dute, ikuskizun publikoen eta jolas-jarduerei buruzko azaroaren 10eko 4/1995 Legeak ezarritako gutxieneko kopurua baino handiagoa, "baimendutako jarduera garatzean hirugarrenei sor lekizkiekeen kalte-galerak ordaintzeko".

Higiene-, osasun- eta segurtasun-baldintzak

Instalazioak ipintzeko eta erabiltzeko orduan, merkaturatutako produktuen eta instalazioen gaineko araudi espezifikoak ezartzen dituen higiene- eta osasun-baldintzak betearaziko ditu Udalak. gaienra, erakundeak ez du baztertu baimenetan bestelako baldintza partikularrak ere ezartzea. Azkenik, derrigorrezkoa izango da txosna bakoitzean su-itzalgailu bat instalatuta egotea, 21a-113B-ko eraginkortasunekoa eta egunean berrikusia, hura erabiltzeko arazorik egon ez dadin.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa