Udako jaiak 2019

Andramariak Urdulizen: kakarraldoa, hegan egiteko prest

Barikuan hasiko dira Urdulizko Andra Mari jaiak, betiko legez aste-akabu bitan banatuta. Lehenengo txanda Landari egokituko zaio, eta bigarrena Elortzari.

Bariku arratsaldean, Udaletxean irakurriko dute pregoia eta hantxe botako du txupina Bittor Arrizabalagak. Ondoren, behin Kakarraldoa jaitsita, herritarrak eta kuadrillak herriko beste aldera joango dira, Landara. Bertan egingo dute lehenengo asteburua, eta bigarrenean, hilaren 13tik 15era, Elortzara itzuliko dira jaiak.

Urtez urte egitarauan ondo errotutako ekitaldiak izango ditugu aurten ere Urdulizko jaietan. Hasierako desfileaz gain, aipatzekoak dira, esaterako, Andra Mari eguneko (irailak 8) ezusteko ekitaldia, edota bigarren asteburuko mozorro-lehiaketa. Auto zaharren topaketa ere egingo da berriro irailaren 15ean, Udaletxeko plazan.  

Jaiak, bere horretan, irailaren 15ean amaituko badira ere, hileko gainerako asteburuetan egingo diren hainbat ekitaldi ere sartu dituzte egitarauan: Urdulizko 7. Herri Ibilaldia (irailaren 21ean), Mendi-bizikletako 1. Familia Topaketa (irailaren 22an) eta plater-tiroketa (irailaren 28an).

Urdulizko Andra Mari jaien egitarauaren berri izateko, deskargatu gure app-a, doakoa da!

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun