Txanda-osagarria ordaintzea eskatzeko elkarretaratzeak egiten ari dira eguaztenero Urdulizko ospitaleko langileak

SATSE, ELA, LAB, CCOO, UGT, ESK eta SAEk sindikatuek salatu dutenez, Urdulizko ospitalea zabaldu zenetik, 2016an, ez zaie txanda-osagarririk ordaindu goizeko eta arrastiko txandetan lan egiten duten beharginei, "Osakidetzako gainerako langileei betidanik egiten zaienaren kontrara". Hori dela eta, zentroko zuzendaritzak eta Osakidetzak osagarri hori berma dezatela eskatzeko elkarretaratzeak egiten ari dira eguaztenetan, 11:00etan, ospitalearen atearen aurrean.

Aurretik aipatutako sindikatuek uste dute neurri horren atzean langileen eskubideen murrizketa berri bat "entseatzeko asmoa" dagoela, auzitegietan ondo ateratzen bada, gainontzeko euskal osasun zerbitzura zabaltzeko.

Hala ere, iragarri dutenez, Auzitegi Gorenak txanda-osagarria jasotzeko bete beharreko baldintzak argitzen dituen epaia eman du oraintsu. Hala, sindikatuek azpimarratu dutenez, baldintza horiek langileen arteko txandakatzea dira, "eta hori betetzen dute Urdulizko ospitaleko dozenaka profesionalek, gaur egun beren eskubideak modu arbitrarioan murriztuta, eta azken urteetan metatutako galera ekonomiko handiarekin jarraitzen baitute".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun