Aurrekontuak osatzeko herritarren iritziak batu gura ditu Urdulizko Udalak

Datorren urteko aurrekontuak osatze aldera, Urdulizko Udalak herritarren beharrak eta lehentasunak ezagutu gura ditu. Hori dela eta, 2022rako aurrekontu parte-hartzaileen prozesua jarri du martxan. Hala, udalerrian erroldatuta dauden interesatuek ekainaren 27ra arte izango dute euren iritziak emateko aukera.

Urdulizen erroldatutako edozein pertsonak parte har dezake Udalak martxan jarritako aurrekontu parte-hartzaileen egitasmoan. Ekainaren 27ra bitartean, interesdunek euren iritziak eman ahal izango dute aurrez aurre udal-arduradunek herrian jarritako postontzietan –udaletxean, kiroldegian, kultur etxean eta gaztelekuan–. Era berean, karpa informatiboak jarriko dituzte ekainaren 22an, metro geltokiaren inguruan 11:00etatik 14:00etara, eta Antsonekoa plazan 16:00etatik 19:00etara; eta ekainaren 23an udaletxeko plazan, 11:00etatik 14:00etara eta 16:00etatik 19:00etara.

Parte hartzeko bete beharreko inprimakia hauxe da.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun