Aurten ere, COVID-19a dela eta, ezin izango dira jai ekitaldi eta Santa Marinako erromeriaz gozatu. Hala ere, udalerrian oso errotuta dagoen tradizioa mantendu gura izan dute jai-batzordeak eta Udalak: azken urtean –2020ko uztailaren 1etik 2021eko uztailaren 1era bitartean– ama izan diren emakumeei omenaldia.
Iaz bezala, ohikoa baino ekitaldi xumeagoa egingo dute, segurtasun arau berriei egokitutakoa, baina "betiko izpirituagaz". Kontuak horrela, aurtengo ekitaldia Antsonekoa plazan egingo dute, hilaren 20an, martitzenean, 19:00etan.
Urdulizko Udalak ama berri guztiak animatu gura ditu ekimen berezi horretan parte hartzera. Horretan, Iratxo Gorria dantza-taldeak aurreskua dantzatuko du eta ama guztiei oroigarri bana entregatuko diote. Horretarako, baina, aldez aurretik izena eman beharko da 94 676 20 61 telefonora deituz edo sarrera@urduliz.eus posta elektronikora idatziz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
