Udalerriko zuhaitz-motak ezagutzeko ibilaldia egingo dute urriaren 17an

Udalerriko natura, paisaia eta kultura ezagutarazteko Txiri-txiri proiektuagaz jarraituko du hilabete honetan Urdulizko Udalak, gizarte-kohesioa eta bizi-ohitura osasungarriak bultzatzeko ere. Hala, urriaren 17an, domekan, oinezko ibilbidea egingo dute, Aintzane Goffard eta Amaia Ordiales dibulgatzaile zientifikoakaz.

Datorren astean, hilaren 17an, domekan, oinezko ibilbidea egingo dute Urdulizen, Txiri-txiri proiektuaren barruan. Oraingo honetan, Aintzane Goffard eta Amaia Ordiales dibulgatzaile zientifikoek zuhaitz-motak, horien jatorriak eta berezitasunak ezagutaraziko dituzte. Halaber, ibilaldian, zuhaitz autoktonoak egoteak dakartzan onura ekologikoak aztertuko dituzte, baita landare-espezie inbaditzaileek udalerriaren inguruan dituzten ondorioak ere.

Ibilbidea Santa Marinako aparkalekuan hasiko da, eta kultur etxetik gertu amaituko da. Jarduera erraza eta oso irisgarria da, bai haurrentzat bai helduentzat irekia, azaldu dutenez. Ibilbide berri horretarako, 50 plaza eskainiko dituzte berriz ere, bi ordutegitan banatuta (10:00etan eta 12:00etan). Bi ordu inguru iraungo du saioak, eta interesdunek Udalaren webgunean eman dezakete izena (www.urduliz.eus).

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun