"Proiektu asko ditugu aurretik eta, batez ere, ilusio handia gure udalerriaren hazkunde ordenatua gidatzen eta laguntzen jarraitzeko", azpimarratu du Jose Ignacio Olea Llona EAJko alkategai berriak. Gaur egungo alkate Javier Bilbao Lopategi ordezkatuko du talde jeltzalean eta, hari buruz galdetuta, hurrengoa esan du: "Esker oneko hitzak besterik ez ditut Javirentzat eta Udalean urte hauetan guztietan berarekin egon diren emakume eta gizonentzat. Bere ahalegin eta dedikazioari esker, gaur egun Urduliz horretatik askoz gertuago gaude urduliztar guztiok nahi dugun baino; Urduliz hobea, zerbitzu gehiagorekin eta bizi-kalitate handiagoarekin".
Olea alkateorde izan da tokiko udaletxean azken hiru urteotan, eta , orain, EAJren proiektua zuzenduko du, "esperientzia eta ideia berriak uztartzen dituen" talde baten laguntzarekin: “Gure taldean tokiko gobernuan beren gaitasuna erakutsi duten pertsonak daude, baita aire berria eta ekimenak dituzten
pertsonak ere, gizarte eta udalerri gisa aurrean ditugun erronkei aurre egiten lagunduko digutenak”.
Jose Ignacio Olea Urdulizkoa da, 61 urte ditu, ezkonduta dago eta seme bat, alaba bat eta bi biloba ditu. Industriako ofiziala izan da, landa inguruneagaz konprometitutako gizona dela eta tradizioak maite dituela azaldu du, eta Urdulizen gaur egun planteatzen diren eta udalerriko bizi-kalitatea eta ongizate komuna nabarmen haztea ahalbidetu duten aukerekin gogotsu dagoela azpimarratu du.