Eusko Jaurlaritzako Osasun sailburu Gotzone Sagarduik baieztatu duenez, osasun-zentro berria eraikitzeko proiektua Osasun Sailak 2024. urterako aurreikusitako plangintzaren barnean dago. Halaber, Osakidetzak daborduko eginda du eraikin berriak beharrezko izango dituen guneen plan funtzionala. Horrez gain, arlo teknikoak egiaztatu du zentro berria eraikitzeko Urdulizko Udalak Eusko Jaurlaritzari eskainitako lurrak egokiak direla. Hain zuzen ere, Arteta kalean eraikiko da osasun zentro berria, Kultur Etxearen eta Haurreskolaren ondoan.
Lursailen lagapena zehaztu ondoren, Osasun Sailak zentro berria eraikitzeko proiektua egingo du, eta, ondoren, obrei ekingo die. Modu horretan, lehen arretako osasun-zentroak berritzeko eta eraikitzeko duen urteko planari jarraituko dio Osakidetzak.
Urdulizko Udalak oso positibotzat jo du albistea: "Funtsezko ekipamendu bat gauzatzeko urrats oso garrantzitsua da. Horrela adierazi diogu Osasun Sailari urte hauetan, gure bizilagunen eskariak eta beharrak behar bezala artatu ahal izateko”.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!