Jubis Beti Lagunak Urdulizko jubilatuen elkartearen lehenengo emanaldia bihar arratsaldean izango da udalerriko Antsonekoa plazan, 19:00etan. 20 lagun inguruk osatzen dute abesbatza hau, eta, gehienak, emakumeak dira. Hilabete andana entseguakaz ibili ostean, Urdulizko herriari emanaldi bat eskainiko dioten lehenengo aldia izango da, eta, euren errepertorioan, euskarazko eta gaztelaniazko kantak abestuko dituzte.
Astelehenero eta eguaztenero entseguak eduki ostean, bihar, barikua, kontzertu "handia" aurkeztuko dute Urdulizko Antsonekoa plazan. Izan ere, Urdulizko jubilatuen etxean, beste ekintza askoren artean, kantatzeko zaletasuna hauspotu dute, modu horretan, biharko emanaldia prestatu duten arte.
Urdulizko Udalaren esanetan, biharko kontzertua "berezia" izango da betiko abestiak kantatuko dituztelako. Izan ere, aurkeztuko duten errepertorioari dagokionez, hurrengo euskarazko eta gaztelaniazko kantak abestuko dituzte: En mi viejo San Juan, Amets, Txoria Txori, Azken Dantza, La Compostelana, Xalbadorren Heriotzean eta No te vayas de Navarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
