Urdulizko Mecaner autogintza enpresa itxi gura duela iragarri dio irailaren 1ean, pasa den barikuan, zuzendaritzak langile batzordeari (ESK, LAB, ELA, CCOO), eta, hala, kaleratze prozedura abiatuko du. Halaber, ELAk salatu du zuzendaritza nahita txikitzen ari dela lan karga eta, hori dela eta, sindikatuak argi adierazi du itxieraren kontra dagoela. Zehazki, egun 144 langile ditu autogintzako lantokiak.
ELAk azaldu bezala, trokelgintza sektoreko enpresa da Mecaner S.L.U., eta sei hamarkada baino gehiago daramatza automobilgintzan. Hala, "harriduraz" hartu du Stellantis taldearen erabakia: "Sindikatuak hilabeteak daramatza salatzen taldea nahita ari dela Mecaner Urduliz lantegiko lan karga txikitzen, eta, ondorioz, enpresari esleitutako lanak taldeko beste lantegi batzuetara desbideratzen".
Halaber, ELAk uste du Mecaner Urduliz lantegia bideragarria dela, eta Stellantis taldeari eskatu dio bere erabakia berraztertzeko, produkzio lantokia zein lanpostuei eusteko neurriakaz: "Mecanerreko bezalako egoeretan azaleratzen da industria politika. Horregatik, ELAk Jaurlaritzari eskatzen dio babes dezala Mecaner, ez dezaten lantegia itxi eta lanpostuei eusteko".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
