ELA sindikatuak salatu du Urdulizko Ospitaleko harrerako langileek urteak daramatzatela lanpostuan ikusmen arazoak izaten, eguzki-argia parez pare sartzen zaielako, eta gehiegizko beroa ere eragiten dielako. Horregatik, eguzkitako betaurrekoakaz lan egin behar izaten dute ikusmena ez kaltetzeko. "Urdulizko Ospitaleko zuzendaritzak uko egin dio irtenbiderik eskaintzeari, horrek Ospitaleko harrerako estetika hondatzea ekarriko lukeelako", seinalatu du sindikatuak. Horregatik, ELA sindikatuak elkarretaratzea egin du atzo, ekainak 26, langileakaz batera zentroan bertan.
Eguzki-argiak ikusmen-arazoak eragiten dizkie langileei, eguneroko lana zailduz. Ondorioz, ELAk nabarmendu du lan baldintzak eta erabiltzaileentzako arretak okerrera egin duela.
Horrenbestez, seinalatu du langileek eta ELAk urteak daramatzatela konponbideak eskatzen, baina Ospitaleko zuzendaritzak beti horiek ukatu dizkie: "Argi dago horrek eragina duela langileen lan baldintzak eta ematen den zerbitzuan; izan ere, langileek ezin dute baldintza horietan lan egin, eta ezin da nahi den zerbitzua eman".
Irtenbidea leihoan estore edo binilo motaren bat jartzea dela azpimarratu du, argia zuzenean lanpostuetara pasa ez dadin. Hala ere, zuzendaritzak esan du irtenbide horrek ospitaleko harreraren estetika hautsiko lukeela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
