Herritarren kezkak eta proposamenak ezagutzeko asmoz auzoz auzo egiten ari diren Auzoka proiektuan, 2023an egin zuten bigarren bilera (landakoa eta gero) San Fermin auzoan izan zen, auzo horretako auzokideek hala eskatuta. Bilera horretan, besteak beste, gaur egun auzoan dagoen iturria kentzeko eskatu zuten herritarrek, erabiltzen ez zelako eta beti zikin zegoelako. Bilera berean, babesleku klimatiko bat edo sakonerarik gabeko ur-parke bat jartzea proposatu zen eta ideia atsegin handiaz hartu izan zen. Harrezkero, Udala lanean aritu da proiektu hori aurrera eramateko.
Obra Arrizabal Elkartea S.L. enpresari esleitu zaio 163.471 eurotan eta orain hasiko da 3 hilabete inguruko iraupenagaz. Klima-aldaketagatik tenperatura gero eta altuagoa da eta, horren ondorioz, herrietan eta hirietan babesleku klimatikoak sortzea garrantzitsua da. Babesleku horiek zuhaitzen itzalak, aterpeak edo atseden hartzeko guneak izan daitezke. Azken hori da, hain zuzen, Urdulizen sortuko dutena. Sakonerarik gabeko birzirkulatutako ur-parkea da, jolaserako espazio familiar eta freskagarri bat, non pertsona guztiek disfrutatu dezaketen eremu irekia eta erabat librea baita. Inklinazio batzuetan bideratutako 12 txorrota izango ditu.
Txorrota hauek erabateko irisgarritasuna duen botoi baten bidez aktibatuko dira, hori bai, bizilagunen atsedena oztopatuko ez duen ordutegi baten barruan. Eremua oso segurua izango da, zoru irristagaitza baitu; akaberak biribilduak eta bandalismoaren aurkakoak izango dira. Adin eta dibertsitate guztietako pertsonek gozatzeko gunea da.
Bestalde, geltokiaren inguruan bainu publiko baten beharra agerikoa izanik, udal teknikariek kokalekurik onena zehazteko azterketa bat egiteari ekin zioten eta, Antsonekoa plazan egon behar zuela erabaki zuten. Izan ere, urtean zehar ekitaldi ugari egiten dira bertan eta, bestalde, euria eta eguraldi txarra egiten badu aterpe bat dauka.
Obra 63.682,3 eurotan esleitu zaio Indarlan enpresari. Datorren astean hasiko da 3 hilabete inguruko iraupena aurreikusita. Komuna irisgarria da eta konketa, pixoihalak aldatzeko plataforma bat eta altzairu herdoilgaitzezko 3 kako ditu. Kanpoaldean, 3 gunetan banatutako pixatoki-gune bat ere badu. Berez garbitzen da eta, nahiz eta sistema osoa informatizatuta egon, eskuz zabal daiteke elektrizitaterik ez badago.