Aurtengo Bizkaiko Bertsolari Txapelketak Urdulizen abiatuko du bere lehia, zehazki, irailaren 28an. Amaiera, Bilboko Casilla kiroldegian izango da, abenduaren 20an. Bizkaiko Bertsolari Txapelketaren egitura berritu dute antolatzaileek, eta finalaurrekoak bi bueltatara jokatuko dira. Hiru fase egongo dira, betiko legez: lehenengo fasean bost saio jokatuko dira; finalaurrekoen lehenengo bueltan hiru saio, bigarren bueltan saio bi; eta azkenik, finala.
Horrela, lehenengo fasean 30 bertsolarik kantatuko dute: Udabarria Bertsotan fasean sailkatutako 21 bertsolarik eta 2023an finalaurrekoetan kantatu zuten beste 9 bertsolarik. Finalaurrekoetako lehenengo bueltara 11 bertsolari sailkatuko dira, eta han izango dituzte zain finalaurrekoetara zuzenean pasatu diren 7 bertsolariak, 2023an finalista izan zirenak.
Urdulizkoa izango da lehen kantaldia, irailaren 28an, eta Lekeition (urriak 4), Mungian (urriak 5), Galdakaon (urriak 11) eta Getxon (urriak 12) egingo dituzte beste laurak.
Aurtengo finalean, azken bi txapelketen irabazlea den Nerea Ibarzabal ez da izango, berak hala erabakita.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
