Susana Lopez Altuna Osakidetzako zuzendari nagusiak, Xabier Ibarzabal Ekonomia eta Finantzako zuzendariagaz batera, eraikina eraikitzen hasiko diren tokia bisitatu du gaur, herriko alkateareagaz eta udalbatzako kideakaz batera. Osasun-zentro berria Krutzejada kalearen ondoan dagoen lursail batean egongo da, Sabino Arana plazaren eta Urdulizko haur-eskolaren artean
2.000 metro karratu baino gehiago eta zerbitzu berriak
Eraikin berriak gaur egungo osasun-zentroa ordezkatuko du. Osasun-zentro horrek 1999. urteaz geroztik Aita Gotzon kaleko 20. zenbakian ematen dio zerbitzua udalerriari, baina txikia geratu da denbora horretan ia bikoiztu den eta hazten jarraitzea aurreikusten den biztanleria artatzeko. Hori dela eta, kokapen berriari esker, eraikitako 405 metro koadroetatik 2.150 metro koadroetara igaro ahal izango da, eta orain arte, lekurik ez zegoelako, herritarrei eskaini ezin zitzaizkien zerbitzu berriak sartu ahal izango dira zerbitzu-zorroan.
Hala, osasun-zentro berriak lau solairu izango ditu, Familiako Medikuntzako, Erizaintzako eta Pediatriako kontsultez gain, emakumeei arreta emateko eremu bat, fisioterapia eta Uribeko osasun mentaleko zentroko kontsultak ere barnebilduko dituztenak. Baliabide asistentzial hori Bizkaiko Osasun Mentaleko Sarearen barruan dago, eta erreferentziazko zentroa da, gainera, Urdulizko biztanleentzat, baita Algorta, Berango, Gorliz, Areeta, Leioa, Lemoiz, Plentzia eta Sopelako udalerrientzat ere. Kontsultek eraikin berriaren heren bat hartuko dute.
Aparkalekuak
Azkenik, nabarmentzekoa da eraikuntza-proiektuak aurreikusten duela eraikineko sotoan gutxienez 25 aparkaleku-plaza gaitzea osasun-zentroko langileentzat, lanera errazago joan daitezen.