2022an, baso autoktonoa berreskuratzeko proiektu bat jarri zen abian. Proiektu horren helburu nagusia da Urdulizko umeen eta haien ingurune naturalaren artean kontzientzia eta lotura sortzea. Horretarako, umeentzako tailerrak eta dibulgazio-tailerrak egiten dira aldizka, bertako zuhaitzak (besteak beste: artea, urkia, haritza, gaztainondoa), espezie inbaditzaileak eta horiek ingurune naturalean duten eragina ezagutzeko. Urte horretan bertan, zuhaitz autoktonoak landatzeko lehen jardunaldia egin zen, eta, 2023an, bigarrena.
Orain arte, 1.450 zuhaitz autoktono landatu dira guztira. 2024an, berriz, Gobernu Taldeak erabaki zuen orain arte planteatutako proiektuak aldaketa bat behar zuela, lurzoru asko galdu delako, eta hori da guztiaren oinarria. Lurzorua beharrezkoa da barazkiak, frutak, ganaduarentzako belarra eta abar ekoizteko, eta lurrik gabe ezer ezin da bizi. Lurzorua sortzeko, hautsi egiten dute arroka ama, eta, haren gainean, hondar organikoak metatzen dira, baina hura sortzeko abiadura oso motela da, eta 5 zentimetro inguru metatzen dira mila urtean.
Gobernu Taldeak, horregatik, Urdulizko herritar guztiak kontzientziatu nahi ditu tailerren bidez, nola-eta baso batek denboran irautea ahalbidetzen duten faktoreen berri emanez eta baso hori nola zaindu eta landare inbaditzaileetatik nola babestu erakutsiz. Proiektua hasi zenetik, hainbat tailer egin dira: konpostajea, substratu on baten ezaugarriak, landare inbaditzaileen espezieak edo zuhaitz autoktonoek bizirauteko behar dituzten zainketak.
Proiektuaren barruan, gobernu-taldeak auzolana planteatu zuen 2023an. Auzolana da lan komunitarioak egitea, eta horiek lankidetzan gauzatzen dira ingurumeneko lantaldeagaz eta boluntarioakaz. Lan horien bidez umeen basoa lehengoratu nahi da, baso komunitarioa hobetuz: espezie inbaditzaileak kenduz, pistak itxiz, ongarria emanez, etab. Helduek basoan lan egiten duten bitartean, umeei aukera ematen zaie ingurumen-hezkuntzako tailerretan parte hartzeko.
