Pasa den udaberrian, Uribeko ESIko euskara zerbitzuak lagunduta, ospitaleko hainbat langilek jarri zuten martxan Mintzakafea, Urdulizko ospitalean euskaraz aritzeko topagunea. Ordu erdiz profil guztietako 10 langile inguru elkartzen dira hileko azken barikuan atsedenaldian euskaraz aritzeko topagune honetan. Euskaraz lasai aritzeko errespetuzko tartea sortu guran eta laneko hizkuntza ohiturak aldatzeko helburuagaz jaio zen taldea. Ospitaleko langile guztiek parte har dezakete ekimenean, euskara maila edozein dela ere.
Azaroak 28an, barikuan, 10:30etan elkartuko dira ospitaleko kafetegian Uribeko ESIko Mintzakafea egitasmoa zabaltzeko eta langile guztiak ekimenean parte hartzera gonbidatzeko.