Aurtengo ekintzak apirilaren 6an hasi ziren, “Urduliz, bertako ekosistemaz mintzatuz” izeneko lehen ibilbidearekin. Jarduera horretan, bertako flora eta fauna ezagutu zituzten parte-hartzaileek. Ibilbidea jasangarritasunean aditua den Lide Rodriguezek gidatu zuen.
Bigarren hitzordua maiatzaren 11n izan zen, “Gure ibaietako ur kalitatea aztertuz” izeneko ibilbidegaz. Urdulizetik Butroe gazteluraino joan ziren parte-hartzaileak ibaiaren egoera aztertzeko.
Urriaren 19an burutu zen hirugarren ibilbidea, “Hondakinik gabeko herri baten alde, Urdulizko hiri-garbiketa” lelopean. Lau orduz, parte-hartzaileek udalerria zeharkatu zuten, hiri-hondakinen inguruan kontzientziatzeko eta naturaguneak garbitzeko. Bildutako hondakinak aztertu zituzten, ingurumen inpaktuari eta kutsadura murrizteko aukerei buruz eztabaidatuz.
Txiri Txiri 2025 edizioaren amaiera azaroaren 30ean heldu zen, “Iraganera begira” izeneko azken ibilbidean. Koldo Somokueto historialari urduliztarrak gidatuta, herriko historia eta pasadizo bitxiak ezagutzeko aukera izan zuten parte-hartzaileek, memoria kolektiboari ahotsa emanez.