Lehen aurkezpen karta honek punk, rock eta hardcore eszenako izen entzutetsuak aurreratu ditu. Zerrendaren buruan Oi! musikaren ikur den Cockney Rejects talde mitikoa ageri da, eta haiekaz batera izango dira, besteak beste, Anestesia, Arene 6, Akatz, Streetwise, Ezta Ilen edota Hell Beer Boys. Kartelak askotariko beste proposamen batzuk ere aurreratu ditu, hala nola Against You, Ilberri, Nevadah, Perlata, Ostikada, Ajou!, M.C.D. (Monjas Carmelitas Descalzas), Odolkiak Ordainetan, The Bad Choice, Killer Zebra eta Moonshakers.
Antolatzaileek "Uribe Kostak inoiz izan den jaialdirik handiena" izango dela azpimarratu dute, eta musika eskaintza zabal honegaz, Urdulizko futbol zelai zaharra eskualdeko kultur agenda astintzeko asmoa iragarri dute.
Sarrerei dagokienez, adierazi dute laster jarriko dituztela salgai tabernetan, eta hurrengo asteetan jaialdiaren inguruko berrikuntza guztiak eta talde gehigarrien iragarpenak ezagutaraziko dituztela.