Helburua alokairuen garestitzea geldiaraztea, etxebizitza eskuragarriagoa egitea eta herritarren etxebizitza-premiei erantzutea da.
Planak alokairua sustatzearen aldeko apustua egiten du, babes publikoko etxebizitza gehiago bultzatuz eta Eusko Jaurlaritzari lurzatiak lagatzeko aukera aztertuz, etxebizitza sozialak eraiki daitezen. Era berean, etxebizitza hutsen egoera aztertzea aurreikusi du Udalak, etorkizunean neurri fiskalak edo kanon bat ezartzeko aukera baloratzeko.
Beste neurri batzuen artean, etxebizitza hutsen gaineko OHZren errekargua handitzea proposatu dute, etxebizitza horiek merkatura ateratzea sustatzeko. Halaber, erabilera turistikoko etxebizitzen jarraipena egingo da, beharrezkoa izanez gero horiek arautzeko neurriak hartu ahal izateko.
Urduliz eremu tentsionatu izendatzekotan, neurri bereziak gutxienez hiru urtez egongo lirateke indarrean, eta horrek aukera emango luke alokairuen igoerak mugatzeko eta prezioen kontrol handiagoa ezartzeko, kontratu berrietan bereziki.