Lan horien helburua energia- eta eraikuntza-birgaitzea egitea izan da, eraikinak zituen erabilera- eta energia-eraginkortasuneko gabeziak konpontzeko, eta instalazioen funtzionamendua optimizatzeko. Irisgarritasunari eta suteen aurkako araudiari egokitzea ere proiektuaren parte izan zen; eta kontratazio-espedientean, gainera, kiroldegiaren eraikuntza-lanez gain, metal-arotzeriako eta berokuntza, aireztapen eta klimatizazio instalazioetako lanak agertzen ziren.
Berritze-lan horiek 2025ean hasi ziren. Hasierako lizitazio-aurrekontua 2,95 milioi eurokoa zen BEZa barne, eta 2025eko otsailean Construcciones Castellano S.A. enpresari esleitu zioten 2.413.255,67 euroan, BEZa barne.
Hasieran, 12 hilabeteko gauzatze-epea aurreikusi zuten, baina ondoren kontratua aldatu eta epea bi hilabete luzatu zuten. 2026ko martxoan egindako aldaketak, gainera, 446.452,28 euroko gehikuntza ekarri zuen.
Azkenik, irailaren 26an egingo dute kiroldegiaren inaugurazioa. Instalazio berrituak ezagutzeaz gain, herriko klubek pilota eta pala, boxeo eta kickboxing, gimnasia erritmiko eta eskubaloi erakustaldiak ere egingo dituzte.