Udalak aurreratu duenez, dokumentalean Urdulizko herritarrek euren eta euren aurrekoen lanbideen berri ematen dute: baserriari lotutako lanak, artisau-sare zabala –errotariak, errementariak, uztarginak, otzaragileak, arotzak, kareginak...–, 1960ko hamarkadako industrializazioak ekarritako ekonomia mistoa eta merkataritza txikiaren garapena eta hedapena, besteak beste.
Ildo horretan, dokumentalaren ardatz nagusia herriko ondare immateriala da. Labayru Fundazioaren esanetan, "atzoko lanbideen aztarnak eta oihartzuna oraindik ere bizirik daude Urdulizko kale-izenetan, toponimian eta familia askoren oroitzapenetan".
Ondarearen Europako Jardunaldien esparruan kokatuta, dokumentala herriko memoria kolektiboa jasotzeko eta belaunaldi berriei iraganeko bizimoduaren aberastasuna transmititzeko asmoz sortu dute.