"Badakizu zelan esaten den tximeleta Urdulizen? Zelan deitzen da Batman-en hiria? Esan ahal duzu gutxienez Zuberoako hiru herri?". Galdera horiekaz aurkeztu du Elkarteak aurtengo lehiaketa.
Parte hartzeko, galdera-orriak Urdulizko hainbat denda, taberna eta saltokietan hartu beharko dira. Behin beteta, Urdulizko Kultur Etxeko postontzian utzi beharko dira azaroaren 30a baino lehenago. Galdera gehien zuzen erantzuten dituzten parte-hartzaileen artean sari bat zozketatuko dute.
Elkarteak azaltzen duenez, Urdulizen herritarren erdia baino gehiago euskalduna da, baina euskarak kalean presentzia txikiagoa dauka. Hori dela eta, euskarazko elkargune eta aisialdi-jarduerak sustatu gura dituztela azpimarratu du.
Elkarteak, beraz, Urdulizko hizkera, Euskal Herriko geografia eta kultura orokorra nahasten dituzten galdera-sorten bidez, herritarrak euskaraz jolastera eta herriaren inguruko ezagutzak probatzera gonbidatu ditu.