Bertsoak entzuteko, sakatu loturetan.
Bertsoak irakurtzeko, hona:
1)
Getxon bizarra lepoan zuen
aberats eta eskale
oro izaten omen zen lehen
besteei kalte egin zale,
baina esana izendaturik
geroaren begirale,
aldizkari bat sortu zen eta
testuz testu, alez ale
esaeraren fede okerrak
gurean egin du kale
eta bizarra lepoan gaur da
jende onaren seinale.
2)
Txapel beltzeko getxoztar haren
lepoko bizarrak zuri
ez zeuden, baina jada baziren
asmo berrien akuri:
zertan aipatu soilik Algorta,
Erromo edo Neguri?
Ezinezkoa ematen zuen
idazki eta irudi
bilakatzea hain udalerri
ezberdinentzako zubi!
Ezinezkoa ematen zuen...
ukaezina dirudi.
3)
Ezerezetik aldizkarira,
Getxotik eskualdera,
hilabetetik astebetera,
bakarretik anitzera.
Orain hiruka sortuko denez
gogobeterik, gainera,
uribekostar estimatua,
gorabeherak gorabehera,
arren ez ahaztu bere ekinak
jarraitu dezan aurrera
funtsezkoena dela beti zuk
betetzen duzun papera.
Xabier Paya Ruiz.
2014ko abendua.
Triangelu batek bere
hiru erpinak ditu-ta,
HIRUKAk ere baditu,
hiru ertz ta hiru punta.
Sarri zuzen, noizbait kamuts,
behar denean zorroztuta;
informaziorik ezin
daitekeelako ezkuta!
Guri hori eskaintzeko
gogotsu dator HIRUKA;
uribekostarrok, beraz,
ezin dezakegu uka
egongo garela behar
bezala informatuta!
Jone Uria Albizuri.
Algorta, 2015eko urtarrilak 22