Aurten ere, Oporretan Txangora egitasmoa antolatu du Uribe Kostako Mankomunitateko Euskara Zerbitzuak, Lehen Hezkuntzako ikasleei zuzenduta. Aisialdiaz gure hizkuntzan disfrutatzea da ekimenaren helburua. Hala, hiru txango egingo dituzte apirilaren 8an, 9an eta 10ean. Lehenengo egunean, Pasaiako Albaola itsas kultur faktoriara joango dira. Bigarrenean, Gasteizko izotz-pistara eta Salburua parkera. Eta hirugarrenean, Muskizko El Pobal burdinolara eta Arena hondartzara. Oporretan Txangora egitasmoan izena emateko epea martxoaren 2tik 4ra bitartean egongo da zabalik. Gorliz, Lemoiz, Plentzia, Sopela eta Urduliz herrietan erroldatutako 6-12 urte bitarteko haurrek parte hartu ahal izango dute.
Izena emateko Mankomunitateko bulegora (Gatzarriñe, 4. Sopela) jo beharko dute interesatuek, edo e-postaz (euskera4@uribekosta.org) egin. Orotara 30 euro ordaindu beharko dira txangoengatik. Diru-sarrerak bermatzeko errentaren jasotzaileek eta familia ugariek 20 euro ordaindu behar dituzte.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!