Korrika 19

Korrika noiz hasiko, beroketa lanetan dabiltza Uribe Kostan

Gero eta gutxiago geratzen da Korrika 19 Urepeletik abiatzeko. Hala, herriz herri antolatutako batzordeak daborduko beroketa lanak egiten dabiltza. Besteak beste, bariku honetan, martxoak 13, bertso-afaria egingo dute 21:00etan Algortako Kasinoan, Bertso Korrika ekimenaren baitan. Sarrerak 15 euroan salgai daude Abian eta Ajuria tabernetan. Ekaitz Larrazabal "Katxo", Imanol Uria eta Inazio Vidal ALBEko bertsolariek abestuko dute. Gorlizen, ostera, The Great Barrier taldeak kontzertua eskainiko du bihar, barikuan, Iberre plazan, 22:00etan. Aurretik, Plentzian, "Heriotza" antzezlana ikusgai egongo da Xapo antzerki taldearen eskutik, 19:00etan, Eliz plazan. Bestalde, Urepelerako autobusa ere antolatzen dabiltza. Hilaren 19an, 08:00etan abiatuko dira aipatutako Behe Nafarroako herrira, bertatik abiatuko baita euskararen aldeko lasterketa. Izena eman ahalko da AEKko euskaltegietan eta Ander Deuna ikastolan, 12 euroan.

Domekara (martxoak 15) helduta, bertso-pilota jaialdia egingo dute Leioako Sakoneta kiroldegian. Hitzordua 12:00etan jarri dute. Pilotariei dagokienez, Garcia Leiza eta Uribe arituko dira nor baino gehiago. Eta bertsotan Beñat Vidal, Paule Loizaga eta Unai Mendiburu ibiliko dira.

Egun berean, Urdulizen, Korrika azoka egongo da 12:00etatik aurrera: bertso-saioa, pintxoak, herri-kirolak, umeentzako jolasak... Antsonekoa plazan.

Hilaren 18an, eguaztena, bertso-poteoa egingo dute Itzubaltzeta / Romoko kaleetatik, 19:30ean Gure Etxea tabernatik abiatuta.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun