Zapatu honetan, hilak 18, Itzubaltzetako Gazte Asanbladak jaialdia egingo du Erandioko Kalezulo gaztetxean, 21:00etatik aurrera. Bertan, "Har ezazu gaztetxearen giltza" goiburupean izango dira Iheskide, Siroka eta Guda Dantza musika taldeak; sarrera 5 eurotan eskuratu ahal izango da. Iaz Itzubaltzeta gaztetxearen 10. urteurreuna ospatzeko jaialdiko kontzertuak bertan behera gelditu behar izan zituzten elektrizitateagaz izandako arazoen ondorioz. Hori dela eta, orduan egitekoak ziren kontzertuak zapatu honetan berreskuratuko dituzte, aipatutako Erandioko eraikin autogestionatuan.
Itzubaltzeta / Romoko neska-mutilek gogorarazi dutenez, 2008ko uholdeen ondorioz Gobela ibaia egokitzeko prozesua hasi zen, “Itzubaltzeta gaztetxea hutsarazteko arriskuan utziz”. Horren aurrean, tokiko gazte asanbladak, hainbat eragilekaz eta herritarrakaz batera, plataforma bat osatu zuen gaztetxearen beharra azaleratzeko eta defendatzeko, “ibaiaren konponketari ere garrantzia emanez”, jakinarazi dute.
Plataforma horrek egindako lanari esker, Getxoko Udalagaz negoziazio mahai bat irekitzea adostu zuten, gaztetxearen esparrua mantentzeko helburuagaz. Hala, okupatutako eraikina mantentzea eta obrak bukatzerakoan bertara bueltatzea adostu zutela gogoratu dute IGAko lagunek.
Bitartean, Udalak espazio txiki bat utzi zien gaztetxeko neska-mutilei. Hala, 2013ko otsailean gaztetxea utzi behar izan zuten, eta ordutik urteurrenak auzoko plazan egin dituzte, “horrek suposatzen duen diru inbertsio guztiagaz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
