Bost udalerri bizkaitarretara eroango du arte garaikidea Bosteko 2015 ekimenak, Bizkaiko Foru Aldundiaren Kultura Sailaren babesagaz. Erakusketak Arrigorriagan abiatu du ibilbidea; ondoren Basaurin, Zornotzan, Leioan egongo da, eta, azkenik, Getxon. Kultur Leioak urriaren 20tik azaroaren 8ra hartuko ditu hautatutako hiru artisten lanak. Abenduaren 9tik 29ra, ostera, Algortako Torrene aretoan ipiniko dituzte Ana Riaño (Bilbo), Roberto Aguirrezabala (Sestao) eta Iker Serranoren (Iruñea) artelanak.
Riaño eta Serrano margolariak dira. Biak dabiltza pintura errealista garaikidearen eta figuratiboaren arloan, baina estilo desberdinak erabiliz. Roberto Aguirrezabalak argazkigintza lantzen du, narrazio formatuan, erretratu «fikzionatuaren» eta paisaia eraldatuaren artean. Hala, euren lanakaz osatuko da Figurazioa eta figurazioak izeneko erakusketa kolektiboa. Bertan, gizakiaren figura bere ikerketa artistikoaren ardatz gisa berreskuratzeko ideia aztertuko dute, foru iturriek azaldu dutenez.
1998an sortu zen Bosteko ekimena, eta Euskal Herriko 70 artistaren baino gehiagoren lanak erakutsi eta ezagutarazi ditu ordutik hona.
Egitaraua
Arrigorriaga
Irailaren 25era arte Arrigorriagako erakusta-aretoa
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
