Euskal Ligako derbia, Algortan

Erabiltzailearen aurpegia Hiruka 2015eko irailaren 25a

Bizkerreko jokalariak, entrenatzen. © BIZKERRE

Zapatu honetan abiatuko da Euskal Liga, eta kategoriako talde uribekostar biek derbia jokatuko dute lehenengo jardunaldi horretan. Bizkerrek Erandioko Betiko Nesken bisita hartuko du Boluen, 16:00etan. Ligari begira, algortarrak faboritoen artean badaude ere, lehia berdintsua espero da. Izan ere, Euskal Ligako aurreko denboraldi bietan, berdinketa bi eta garaipen bana izan ziren talde bien artean. Garaipenak, gainera, bakoitzaren etxean izan ziren.

Bizkerre

Jon Elorzak zuzentzen dituen "bizkeneskek" denboraldi-aurre bikaina egin dute, Eibar, Arratia eta Euskal Ligako arerio zuzenak diren Elorrio eta Aurrera B erraz irabazita. Gasteiztarrek ez dute ahaztuko zuri-urdinek sartutako dozena erdi gol. Ildo horretan, algortarrek ahalegindu beharko dute euren atea itxita izaten, denboraldi-aurrean legez, iazko laugarren postua hobetu gura badute.

Erandioko Betiko Neskak

San Lorenzokoek ere lehenengo partidatik landu beharko dute sailkapen orokorra, iazko 7. lekua hobetzeko. Aurten laguntzarik izango dute, Bravok eta De la Fuentek utzi arren, hiru kadete igo eta Basauriko jokalari bi hartu dituztelako.

Kirolak
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun