EUDEL EAEko Udalen Elkartea errefuxiatuak hartzeko Ekintza Batzordean parte hartzen ari da. Hori horrela, elkarte horrek unean uneko informazioa emango die udalei, "argi jakin dezaten zein diren euskal ekintza-estrategian artikulatzen diren erantzunak, esparru horretako udal jarduerak behar bezala koordinatu daitezen", azaldu dute. EUDELek dioenez, behar gehien duten pertsonei laguntza ematen dien giza mugimendu aberatsa du EAEk. Hori dela-eta, errefuxiatuei laguntza emateko ohiko bideak zeintzuk diren ezagutarazteko kanpaina martxan ipini du.
Elikagaiak batzeko, elikagaien bankuen helbide eta telefonoak iragarri dituzte; era berean, gobernuz kanpoko elkarteetan laguntzeko gonbita luzatu dute, CEAR eta Gurutze Gorrian, berbarako.
Errefuxiatuentzako etxebizitzak lortze aldera, etxea libre dutenek erakundeei eskaintzeko aukera ere zabaldu dute, Eusko Jaurlaritzaren Alokabide zerbitzuaren bitartez.
Siriako 1.200 errefuxiatu inguru hartuko ditu Hego Euskal Herriak. Bizkaiak 520 bat hartuko ditu; Gipuzkoak, 330; Nafarroak, 200; eta Arabak, 150. Datuok aldakorrak izan daitezkeela adierazi dute arduradunek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.