Bihar, martitzena, besteak beste, Getxon, Leioan eta Erandion egingo dute Oroimenaren Eguneko ekitaldi bana. Hurrenez hurren, bertan parte hartzera deitu dute Imanol Landa, Mari Carmen Urbieta eta Joseba Goikouria alkateek. Biktimak oroitzeko ekimenak Getxoko udaletxe aurreko zabaldegian, Leioako Elexalde parkean dagoen "Leioako indarra" izeneko eskultura parean eta Altzagako Irailaren 23a plazan (udaletxearen aurrean) egingo dituzte, goizeko 12:00etan. Bertan, 15 minutuko isilunea izango da. Udal agintariek parte hartzera gonbidatu dituzte Udalbatzetako kideak, udalerrietako erakunde eta eragile sozialen ordezkariak eta herritarrak.
Izan ere, Urbietak eta Goikouriak aitortu dutenez, "asmoa da Oromeinaren Eguna ahalik eta adostasun handienagaz egitea eta, horretan oinarrituta, urterik urte aurrerapausoak ematea bizikidetzaren esparruan gure udalerrian".
Leioa eta Erandioko alkateek akordura ekarri duenez, "2013ko martxoaren 14an, EAJ, EH Bildu, PSE-EE eta PP talde parlamentarioek puntu bat bozkatu zuten batera, biktimen eta oroimenaren politikei buruzkoa. Hau da, azken hiru urteotan bakearen eta bizikidetzaren esparruan lortutako zeharkako adostasun bakarretakoa". Aipatu akordioak honako hau zioen: "bakea eta bizikidetza lortzeko, beharrezkoa da indarkeriaren bidegabekeria aitortzea, egindako mina onartzea eta biktimak duintzea; izan ere, biktima guztiek merezi dute egia, justizia eta konponbidea lortzeko eskubidea".
Bitartean, Imanol Landa Getxoko alkateak adierazi du ekimenak bat egiten duela "udalerriko terrorismoaren biktima guztien omenez" urtero egiten den ekitaldiagaz. "Horixe abenduaren 2an izango da, Getxon egindako lehenengo omenaldiaren data berreskuratuz", gaineratu duenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
