Besteak beste, Getxoko eta Leioako Udalek bat egin dute Iñigo Urkullu EAEko lehendakariak eta Eudelek egindako deialdiakaz. Hala, bost minutuko kontzentrazio isil bana egongo da eguerdiko 12:00etan, bariku gauean Parisen gertatutako atentatuak gaitzesteko. Uribe Kostako udal administrazioetatik, Getxoko eta Leioako tokiko administrazioek baino ez dute deialdi ofiziala egin oraindino. Euskal Herriko Unibertsitateak ere 12:00etan jarri du hitzordua Araba, Bizkaia eta Gipuzkoako campusetan; Leioa-Erandio eremuan, Mikel Laboa plazan egingo dute.
Getxoko eta Leioako udalak "erabateko irmotasunaz" gaitzetsi dituzte Parisen gertatutako atentatu izugarriak. Era berean, biktimen senideei eta adiskideei adierazi diete elkartasuna, eta bete-betean arbuiatu dute indarkeria terrorista.
129 lagun hil eta ehunka zauritu larri egon ziren joan den barikuan Parisen izandako atentatuetan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!