Espainiako armada aurrera eta atzera ibili da goizean zehar Uribe Kostan. Berbarako, inguruan hainbat kamioi-militar zeudela itzartu dira gaur Algortako Jauregialde kaleko auzokideak. Hala ere, indar armatuko kideak Sopelan, Barrikan eta Gorlizen ere ibili dira, antza, maniobra batzuk egiten. Getxoko EH Bilduk, bere aldetik, udalerriko alkateari horren berri duen edo ez galdetu dio; baina horrek ezer ez dakiela azaldu du. Hori horrela, koalizio abertzaleak "armada espainolaren erretreta exijitu" du.
Getxoko EH Bilduk, gainera, gaur goizeko ustezko maniobra militarrak "arbuiatzeko" mozioa sartuko du osoko bilkuran, "gure kaleetan indar armatuen presentzia eta maniobrak, eta, bide batez, Espainiako Defentsa ministroari protesta ofiziala bideratzeko".
Koalizio abertzaleak gogoratu duenez, ez da lehenengo aldia armadak "herritarron borondatearen gainetik inposizioaren erakustaldi bat egiten duela" gure kaleetan, "herritarron segurtasuna arriskuan jarriz eta artega eta beldurra eraginez".
Gerra-jokoak ezin direla "onartu" salatu du EH Bilduk. Hori dela eta, indar armatuen presentzia eta maniobrak arbuiatzeko, Defentsa ministroari protesta ofiziala bideratzeko eta Getxo udalerri antimilitarista eta bakezalea aldarrikatzea eskatuko dio koalizio abertzaleak Udalari.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
