Guardia Zibilak 14 eta 16 urte bitarteko lau arraunlari erreskatatu zituen pasa den domekan Ibaizabalen, Astrabudu aurrean, Getxo Arraun eta Santurtziko lau arraunlariek osatutako trainerua apurtu ostean. Istripua goizeko 11:00ak aldera jazo zen, Astrabudu inguruan; handik gutxira, bertatik zebilen Guardia Zibilaren Itsas Zerbitzuko "Cartuja" S08 patruilariren eskifaiak ikusi zituen arraunlariak seinaleak egiten, gaur Espainiako Gobernuaren Bizkaiko Azpiordezkaritzak jakinarazi duenez. Haiengana hurbildu ostean, guardia zibilek ikusi zuten trainerua hondoratze bidean, zuntzezko branka apurtuta. Bertsio horren arabera, ontzia "itsasoan une horietan zebilen egoera txarragatik erabat apurtu" zen.
Hondatutako traineruaren lau arraunlariak behin-behinean helduta zeuden beste lau lagunen ontzira, eta "hipotermia sintoma argiak" zituzten, erakunde armatuaren kontakizunaren arabera. Gainera, "haize ufada bortitzak eta euri-jasa" zebiltzala gaineratu du Azpiordezkaritzak, "itsasoaren egoerak kirol-nabigazioa alde batera uztea" gomendatzen zuela iritzita.
Horren aurrean, agenteek lau naufragoak ontziratu zituzten eta beharrezko sorospenak eman zizkioten. Geroago, zortzi arraunlariak eta ontzi biak eroan zituzten Getxo eta Santurtziko arraun-kluben egoitzetara. Erreskatatutako gazteek ez zuten osasun-laguntzarik behar izan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.