Euskal Udalen Elkarteak (Eudel) gaitzespen irmoa adierazi die gaur goizean Bruselan gertatutako atentatuei; Eudelek erabateko irmotasunaz deitoratu du indarkeria terroristaren basakeria, eta dolumina eta elkartasuna helarazi die biktimen senide eta hurbilekoei. Hala, bihar, martxoak 23 (eguaztena), 12:00etan, udaletxeen aurrean, bost minutuko kontzentrazio isilak deitzera gonbit egin die udal denei.
Besteak beste, Getxoko, Erandioko, Sopelako eta Barrikako udalek bat egin dute ekimenagaz. Euskal Herriko Unibertsitateak (EHU) ere bost minutuko kontzentrazioak deitu ditu hiru campusetan bihar, publikoki hildakoen senitartekoei elkartasuna erakusteko eta gertatutakoa gaitzesteko helburuagaz; Leioako campusean 12:00etan batuko dira, Mikel Laboa plazan.
Gaur goizean leherketa bi izan dira Bruselako Zaventem aireportuan eta beste bat hiriko metroaren Maelbeek geltokian. Belgikako agintarien arabera, aireportukoa suizida batek eragindakoa litzateke; orain dela ordu erdi eskas Estatu Islamikoak bere gain hartu ditu atentatuak, erakundeari lotutako Amaq albiste-agentziak jakinarazi duenez. Hamalau lagun hil dira gutxienez aireportuko erasoetan, eta hogei metrokoetan. Gainera, 136 lagun zauritu dira.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
