Zapatuan, goizeko 10:00etan, bosteko futbol-txapelketa jokatuko dute Lamiakoko zelaian. 13:00etan, bazkaria eta kupelak izango dituzte leku berean. 19:00etatik aurrera, ordea, kontzertua izango da Udondo gaztetxean, Audiencia Nacional punk-rock euskal taldeagaz, G. Perez rap egileagaz, Rock Alkohol bandagaz eta Toledoko Milicia Urbana oi musika-taldeagaz.
Futbol-txapelketan parte hartzeko talde bakoitzak bost euro ipini beharko ditu; bazkariaz eta kupela-edanaz gozatzeko, 12 euroko txartela hartu beharra dago, prezioan kontzertua ere barne dagoela. Azkenik, kontzertura soilik joango direnek 4 euroan eros ditzakete txartelak, Udondo gaztetxean bertan.
Bitartean, KNEk abiatutako elikagaien eta arroparen elkartasun-bilketa datorren zapatuan amaituko da. Ordura arte dohaintzak egin daitezke Altzagako Beiti tabernan eta Erandioko Kirol Elkartearen egoitzan.
Argibide gehiagorako, erandioultras@gmail.com posta elektronikora idatz daiteke.