Udaren etorreragaz, Metro Bilbao garraio-konpainiak ordutegiak aldatzen ditu sasoiko eskarira egokitzeko. Gaur, uztailak 1, hasiko da udako zerbitzua; irailaren 4ra arte egongo da indarrean. Hala, barikuko 23:00etatik zapatuko 06:00etara eten barik ibiliko dira. Bestalde, domekan, uztailak 3, gau osoan ibiliko da metroa, zapatu gauetan ohi den maiztasunaz; astelehenean, uztailak 4, Berriotxoako Balendin Deunaren jaia delako.
"Ordutegi horiek urtaro honetan izaten diren ohitura aldaketara egokitzen dira. Eskolak amaituta, aisialdiak gora egin eta herrietako jaiak han-hemen, horiek dira metroa zerbitzua doitzera eroaten duten arrazoi nagusiak", adierazi dute Metro Bilbaoko arduradunek.
Udako zerbitzu berrian epe bi bereizten dira: batetik, abuztuko eskariari erantzuten diona, Bilboko Aste Nagusian izan ezik; eta, bestetik, uztailerako eta irailaren lehen asterako jartzen dena. Era berean, ohi den legez, zerbitzu bereziak egongo dira Sopela, Santurtzi, Algorta eta Barakaldoko jaietan. Aste Nagusian, metroa ez da bederatzi jai-egunetan itxiko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
