Eudelek gaitzespen irmoa adierazi du bart Nizan hildako asko eta zauritu ugari eragin zituen atentatuaren aurrean. "Eudelek erabateko irmotasunez gaitzesten du indarkeria terroristaren basakeria, eta dolumina eta elkartasuna helarazi gura die biktimen senide eta hurbilekoei", erakundeko arduradunek adierazi dutenez. Une latz honetan, Euskadiko Udalen Elkarteak "besarkadarik solidarioena eta hurbiltasun-sentipen sakonena" bidali gura die Nizako hiriari eta Frantziako herritar denei.
Francois Hollande presidentea Avignonen zen une horretan, eta berehala Pariserantz joan da, krisi batzordean parte hartzera, Eliseoan. "Atentatu terrorista" izan dela esan du, eta Frantzia osoa "mehatxu terroristaren pean" dagoela. Aurreneko erabakia ere hartu dute Frantziako agintariek: uztailaren 26an kentzekoak ziren salbuespen-egoera beste hiru hilabetez luzatzea erabaki dute.