Ohiko zuri-urdinak eta gaur egun Athleticeko jokalariak Jordanian daude egunotan, Espainiako selekzioagaz batera. Eurekaz badira beste zuri-gorri bi: Leyre Monente eta María Blanco. Euretako batek ere ez zuen parte hartu Japoniaren aurkako asteleheneko partidan. Espainiako selekzioak 3-0 galdu zuen. Espainiarren erronka ez zen erraza, Japonia baita munduko kopa altxatzeko selekzio faboritoa. Asiakoak finalaurrekora ailegatu ziren jokatutako lau partidak irabazita; Amerikako Estatu Batuak, Ghana, Paraguay eta Ingalaterra, azken hori final-laurdenetan. Astelehenean, Takahasik estreinatu zuen markagailua, 14. minutuan. Handik aurrera partida aldats gora ipini zitzaion Espainiako selekzioari. Bigarren gola Lucía Rodríguez Espainiako kapitainak sartu zuen, bere atean. Azkenik, Takahasik bere bigarren gola sartu zuen, partida amaitzeko 15 minutu falta zirenean.
Egurrola eta Hernández finaletik kanpo geratu dira
Oihane Hernández eta Damaris Egurrola Erandioko Betiko Neskak taldeko jokalari ohiak Emakumezkoen 17 urte azpiko Munduko Futbol-txapelketaren finaletik kanpo geratu ziren pasa den astelehenean, jokatu barik. Hortaz, jokalari biek brontzezko domina irabazteko aukera izango dute bariku honetan, 16:00etan, Venezuelaren aurka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun