Zapatu honetan, Getxoko Andra Mari probalekuan, Boxeoa Pizten izeneko borrokaldi-festa mistoa egingo da, 20:00etatik aurrera. Kirol-ekimena Izarrak Boxing taldeak eta MGZ sustapen-enpresak antolatu dute; sarrerak salgai daude daborduko, 10 euroan. Azken unera arte itxarongo dutenek 15 euroan erosi ahal izango dute txartela, Andra Mariko leihatilan bertan. Denera, bederatzi borrokaldi izango dira zapatuan.
Profesionalen mailan Guillermo Riveroren estreinaldia izango da gaueko saio nagusia. Larrabasterran bizi den algortarrak Redouan Bentalev marokoarra izango du arerio. Rivero ahaleginduko da amateurretan lortutako 26 garaipenei beste bat gehitzen, kategoria berri horretan.
Estreinaldi horregaz batera, arreta handiena isiotuko dute beste borrokaldi bik: Izarrak Boxing taldeko Naiara Olmedo sopeloztarrarenak eta Goizane Pérezenak, alegia. Olmedo Lopabox taldeko Corey Macclintock-egaz lehiatuko da; Pérezek Ukabilak klubeko Aleliren aurka borroka egingo du. 16 soken artean borrokatuko dira Izarrak gimnasioko beste kide hauek: Iñigo Lopez, Markel Garcia, Unai Ibañez eta German Zubiaur.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.