Uribe Kostako Zerbitzu Mankomunitateak Ekoguneko bost ikastaro jarriko ditu martxan ikasturteko bigarren lauhilekorako. Proposamenak honakoak dira: hasiberrientzako joskintza, hasiberrientzako brikolajea, aurreratuentzako joskintza, arropa birziklatzen ikasteko tailerra eta jasangarritasuna eta kakorratz tailerrak. Izena emateko epea abenduaren 20ra arte, martitzena, zabalik egongo da.
Ikastaroak doakoak dira eta Mankomunitateko edozein herritan erroldatutako 18 urtetik gora duten pertsonei zuzenduta daude. Aurreratuentzako ikastaroan izena ematen dutenek oinarrizko ikastaroa eginda izan behar dute aldez aurretik.
Eskaera kopurua eskaintzen diren lekuak baino altuagoa denean, lekuak zozketa bidez esleituko dira, eta kanpo geratuko direnak itxaron-zerrendara pasatuko dira. Beti izango dute lehentasuna beste ikastaro batean apuntatuta ez dauden pertsonek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!