Ertzaintzak 45 urteko gizonezko bat atzeman zuen herenegun, eguaztena, Erandion. Eusko Jaurlaritzaren Segurtasun Sailak zabaldu duenez, atxiloketa 14:00ak jota izan zen. Ordu horretan, Erandiotik zebilen ertzain-patruila batek gizonezko bat ikusi, susmagarri baten profilagaz alderatu eta gaizkilea zelakoan atxilotu zuen. Pasa den abenduan, gizon batek Leioako taberna batean labanaz eraso egin zion zerbitzariari.
Abenduan ipinitako salaketan biktimak azaldu zuenez, pasa den urrian gizon bat kanporatu zuten tabernatik, bezero bati arazoren bat sortzeagatik. Abenduaren 26an, gizon hori ostatura bueltatu zen, bertan bezerorik ez zegoela. Sartu bezain laster, burukada bat eman eta laban bategaz aurpegian zenbait zauri egin ziola salatu zuen ostalariak. Gainera, heriotza-mehatxuak ere jaso zituela nabarmendu zuen tabernariak.
Une batean, zerbitzariak lortu zuen lokaletik alde egitea eta erasotzailea barruan ixtea. Biktimak Polizia deitzen zuen bitartean, gaizkileak aulki batez leihoa apurtu eta ihes egin zuen. Leioako Udaltzaingoak eta Ertzaintzak lekukotasunak bildu eta ikerketa abiatu zuten pasa den eguaztenera arte. Ertzaintzaren ustean, herenegun atxilotutako gizona abenduaren 26ko erasotzailea ei da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
