Uribe Kosta txapeldunordea izan da BBK Bertso Sariketan

Bertsolari denak batera ipini ziren argazkirako. © BERTSOZALE ELKARTEA

Giro ederrean jokatu zuten Bertsolari Gazteen BBK Sariketaren finala, Bilboko BBK Aretoan, martxoaren 31n; Uribe Kostako eta Busturialdeko taldeek abestu zuten. Eskualdeko neska-mutilak ahalegindu baziren ere, Busturialdeko taldea izan zen puntu gehiago batu zituena, eta horiek irabazi zuten aurtengo txapela.

Uribe Kostak 359.50 puntu lortu zituen; Busturialdeak, ostera, 380.50 puntu. Finaleko Bizkaiera Onenaren saria ere Busturialdeko batek jaso zuen, Ibai Amillategi gernikarrak, eta Iratxe Ibarra bertsolariak eman zion.
Aurtengo txapelketa berezia izan da: 25 urte bete ditu Bertsolari Gazteen BBK Sariketak. Hori ospatzeko, Iratxe Ibarraren bertso jarriak kantatu zituen publikoak, bertsolariaren beraren eta Eire Larrea gitarra-jolearen laguntzagaz. Ibarrak BBK sariketaren lehenengo edizioan parte hartu zuen, baita irabazi ere, Lea-Artibaiko taldekideakaz batera. Bizitako esperientziari ipini zizkion bertsoak Ibarrak, eta sariketa sortu zuten Jon Lopategiri eta Joserra Bilbaori eman zizkien eskerrak.

Dena dela, finaleko benetako protagonistak parte hartu zuten hamabi bertsolariak izan ziren. Uribe Kostari dagokionez, honako hauek: 18 urtera artekoetan, Irene Ezkurrak, Aritz Landetak eta Unai Mendiburuk kantatu zuten; 24 urtera artekoetan, berriz, Inazio Vidalek, Kerman Díazek eta Paule Loizagak parte hartu zuten.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun