Jendartea  Barrika  Berango  Erandio  Getxo  Gorliz  Leioa  Lemoiz  Plentzia  Sopela  Urduliz  Uribe Kosta 2017-07-07 07:07

Uribe Kostako Uda III. argazki-lehiaketa martxan da!

Zelan bizi dugu uribekostarrok uda?
 Zure irudien bidez konta dagigun! Hirugarrenez, Uribe Kostako Uda argazki-lehiaketa antolatu du HIRUKAk. Inguruotan edo urruntxoago, uribekostarron uda zelakoa den irudikatzeko prest zaude? Bidali zure udako argazkiak Uribe Kostako Uda argazki-lehiaketara. Nora eta zelan? Aurreko ekitaldietan legez, argazkiak zuk zeuk igoko dituzu lehiaketaren atalera, uztailaren 7tik irailaren 14ra bitartean. Hiru sari potolo banatuko dira...

Uribe Kostako Uda III. argazki-lehiaketa martxan da!
Iazko lehiaketan parte hartu zuen argazkietako bat. © ITSASO BASAÑEZ | Ikusi handiago | Argazki originala

Hirugarrenez antolatu du HIRUKAk Uribe Kostako Uda argazki-lehiaketa, NekaturrekPlentziako Casa de Marinos hotelak eta Algortako Saigon Fusion jatetxeak lagunduta. Uribekostarrak non, Uribe Kosta han! Zelan, non, nogaz igarotzen duzu uda? Konta egiguzu argazkien bitartez! Zuretzat uda zer den adierazten duen argazkia HIRUKAri bidaltzea gura dugu: uztailaren 7tik irailaren 14ra bitartean, le­hiaketaren atalera igoz.

Inguruotan edo urruntxoago, uribekostarron uda zelakoa den irudikatu gura dugu: eskualdean udaz gozatzen duten edo munduan barrena oporretan dauden Uribe Kostako herritarren lekukotza ja­so gura dugu; baita euskaraz harremanetan ipintzeko topalekua eskaini ere. Lagun arteko giroaren, hondartzako zein mendiko osteren, he­rriko jaietako irudien, monumentuen, eraikinen, paisaien, lagunen eta abarren ar­gazkiak bidal ditzakezue. Saridunak herri-bozketaz aukeratuko dira, irail amaieran.

Parte hartzeko baldintza, betebehar eta gainerakoei dagokienez, adi  honako hauei denei:

Uribe Kostan jaio edo bizi diren 18 urtetik gorako norbanakoek parte hartu ahal izango dute lehiaketan. Uribe Kostatzat hartzen dira ondoko herri hauek: Erandio, Leioa, Getxo, Berango, Sopela, Barrika, Urduliz, Gorliz, Plentzia eta Lemoiz.

2017ko udako irudiak aurkeztuko dira; parte-hartzaile bakoitzeko 3 argazki, gehienez.
Argazkiek horizontalak izan beharko dute; kolorezkoak edo zuri-beltzezkoak; JPG edo PNG formatuetan.

Le­hiaketaren atalera bertara igo beharko dituzte fotografiak. Berton, Uribe Kostako Uda argazki-galerian ikusgai egongo dira.

Sariei dagokienez, argazki-lehiaketaren hirugarren ekitaldi honetako 3 sariak ondoko hauek dira: lehenengo saria izango da pertsona birentzako gau biko egonaldi bat NEKATUR Nekazal Turismo elkarteko ostatuetan (behe-denboraldian); bigarren saria, pertsona birentzako gau biko egonaldia eta bazkari ala afari bat Plentziako Casa de Marinos hotelean (behe-denboraldian); hirugarren saria, pertsona birentzako afari bat Algortako Saigon Fusion jatetxean.

Hiru saridunak herri-bozketaz aukeratuko dira. Hala ere, lehenengo, HIRUKAren inguruko argazkigintzan aditu talde batek galbahetuko ditu aurkeztutako argazkietatik 15 onenak; gero, horietatik 3 onenak aukeratzeko, herri-bozketa egingo da: irailaren 18tik urriaren 1era, hiruka.eus webgunean. Bozka-emaileak hiru argazki aukeratuko ditu, gogokoena lehenengoa; besteak, segidako hurrenkeran. Jasotako boto-kopuruaren hurrenkeran banatuko dira sariak. Ostean, urriaren 11n jakinaraziko dira saridunak.

2017/07/07

hiruka.eus Barrika Berango Erandio Getxo Gorliz Leioa Lemoiz Plentzia Sopela Urduliz Uribe Kosta

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa