Ekonomia  Uribe Kosta 2017-07-19 21:53

Indarrak batu dituzte eraikuntza-klusterrak eta tokiko euskal komunikabideek

Eraikune EAEko eraikuntza-klusterra eta Tokikom akordio garrantzitsu batera heldu dira gaur goizean. Eragile biek euskarazko edukiak sortu eta ipiniko dituzte irakurleen eta erabiltzaileen eskura, eraikuntzaren gaineko komunikazioa hobetzeko. Lankidetza-hitzarmena sinatzeko ekitaldian parte hartu dute Alberto Marín Eraikuneko presidenteak eta Jone Guenetxeak, tokiko euskal komunikabideen presidenteak. HIRUKA Tokikomeko kidea da.

Indarrak batu dituzte eraikuntza-klusterrak eta tokiko euskal komunikabideek
Alberto Marín eta Jone Guenetxea, gaur goizean. TOKIKOM | Ikusi handiago | Argazki originala

Hala, Tokikom Eraikuneren komunikazio-bazkide bihurtu da; euskal tokiko komunikabideen sareak informazioak, txostenak eta elkarrizketak landuko ditu, eraikuntzaren sektorearen berri emateko. Modu berean, Eraikunek eragindako albisteak jasoko ditu Tokikomek Gurean.eus digitalaren Eraikuntza atalean.

Tokikomeko presidentearen arabera, gaurko hitzarmena etorkizunean gauza daitezkeen beste akordio batzuen lehenengoa da. Hala, Tokikomek beste sektore batzuetako eragileakaz aliantzak sortu gura ditu. "Indarrak batu nahi ditugu gure helburuak lortzeko eta proiektu berriak martxan jartzeko. Tokikomen eta Gureanen filosofia da beste sektore batzuetako eragileekin sinergiak sortzea, eta irakurleen, profesionalen eta industriaren interesen arteko harremanean sakontzea", dio Guenetxeak.

Modu berean, Alberto Marín Eraikuneko presidenteak mahaigaineratu du klusterrak duen interesa komunikazio-bideak indartzeko. Gainera, Marínek azpimarratu du eraikuntzaren "askotariko sektore zabal horrek" berrikuntzaren arloan duen gaitasuna eta EAEko Barne Produktu Gordinean (BPG) duen pisua ezagutarazteko dagoen beharra.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa