Hala, aurrera segituko du Leioa eta Erandio zeharkatuko duen Bilbotik Getxorako bidegorria egiteko proposamenak. Asier Atutxa Portuko Agintaritzako presidenteak Bizkaiko Batzar Nagusietan egindako agerraldiaren ondoren, Batzar Nagusietako Ahal Dugu taldearen ustean, "argi zegoen ibaiko errepidea, orain arte Portuko Agintaritzaren jabetzakoa izan dena, udalerriei utziko ziela, bidegorria errazago egin dadin, Portuko Agintaritzaren administrazio-kontseiluak hartutako erabakiaren arabera. Baina, hori eginda ere, errepidea nork finantzatuko duen erabakitzeko dago, bai eta Erandio eta Leioa zeharkatzeko lurren lagapena egingo ote den ere", azaldu Bizkaiko Batzar Nagusietako Ahal Dugu taldeak.
Hala, Neskutz Rodríguez talde horren bozeramaileak eta Jose David Carracedo diputatuak, proposamen bat egin dute elkar hartuta, Sustapen Ministerioari eskatzeko Portuko Agintaritzagaz batera "BI-711 errepideko bidegorria eraikitzeko beharrezko tramiteak egiten has dadila, proiektuan inplikatuta dauden udalerriakaz koordinaturik", diputatuak azaldu duen legez. "Proiektuaren kezkabiderik handienetako bati ere" egin diote erreferentzia proposamen horretan: Espainiako Sustapen Ministerioari "behar den finantzaketa emateko" eskatu diote.
Rodríguezek adierazi du Ahal Dugutik apustu egiten dutela "aisialdi-eredu jasangarri eta ez merkaturatu" baten alde eta Bizkaiak, euren iritzian, "horrelako aisialdigune eta jolasgune gehiago" behar dituela. Horregatik, bidegorri-sarea kohesionatzea eta handitzea proiektu "interesgarria, beharrezkoa eta lehentasunezkoa" iruditzen zaie, batzarkideak azpimarratu duenez.
"Bizi-kalitatea eta ongizatea daude jokoan, bai eta auzokideen eskaera bati erantzuna ematea ere" nabarmendu du bozeramaileak. "Espero dugu dena ondo bideratuko dela eta bidegorri-sare oso bat izango dugula erabilgarri" adierazi du Carracedok.