Euskal preso eta iheslari politikoen senideen eta lagunen elkarteak iragarri duenez, martxarako 30 piragua bikoitz ditu eskuragai, doan. Erreserbak binaka egin daitezke honako telefonora deituta: 687740199. Dena den, argitu dute edozein ontzi-motagaz parte hartu daitekeela. Badian, Zarzaparrilla taldearen itsas kontzertua izango dute entzungai. Behin mobilizazioa bukatuta, 14:30ean herri-bazkariaz gozatuko dute Plentzia eta Gorlizko Danontzat gaztetxean. Arrastian prestatuta zituzten umeen puzgarriak eta jolasak bertan behera utzi dituzte. Izan ere, antolakuntzak deitu du Kepa del Hoyo oroitu eta egungo espetxe-politika salatzeko ezker abertzaleak antolatutako nazio-manifestaziora. 18:00etan irtengo da Galdakaoko udaletxeko plazatik.
"Etxean eta bizirik"
Euskal Herriko hondartzetako mobilizazioen bidez "dispertsio-politikaren amaiera" exijituko du Etxeratek, "euskal preso eta iheslari politikoak behingoz etxean eta bizirik nahi ditugulako". Gogorarazi dutenez, "dispertsioa, pairatzen dugun salbuespeneko politika hau, ia hiru hamarkada dituen anomalia bat da. Normaltasunez hartua izatea onartu ezin dugun anomalia bat, euskal gizarteak ezin duelako normaltasunean bizi. Ehunka familien gainean, milaka pertsonen gainean, egunez egun, dispertsioaren ondorioen zama erortzen delako: oinazea eta mina".
Etxerat elkarteko ordezkarien esanetan, "gure borondatez egiten ez ditugun bidai batzuetan gure bizitza arriskuan jartzen dugu azkenengo hiru hamarkadetan. Adinduak diren gure senideak nekatuta eta azkenean gaixoturik ikusten ditugu milaka orduko eta milaka kilometro kotxe edo autobus baten eserlekuan igarotzeagatik. Adingabekoak ikusten ditugu, urduri eta nekatuak, euren jolas edo ikasketa orduak galtzen dituzte, haurtzaroko orduak, arrazoi beragatik. Bidai amaigabeetako asteburuak ikusten ditugu bata bestearen jarraian, gure osasun fisiko eta psikikoa zein gure ekonomia nola higatzen den ikusten dugu. 16 hildako ikusten ditugu".
Gainera, Etxerat kontzientea da egoera hori ez dutela euren kideek bakarrik ikusten: "euskal gizarteak dispertsioa eta urrunketarekin behingoz bukatzea eskatzen du. Eta testuinguru horretan oso nabaria da azken urtean izandako aldaketa. Hor dugu alderdi, sindikatu eta eragile sozialakaz gaixo dauden presoak askatzeko eta euskal presoak Euskal Herritik gertu dauden espetxeetara ekartzeko lantzen ari garen Akordio Soziala. Baita euskal preso eta iheslariak etxerako bidean jartzeko lan eremuan Ireki dinamikak lortutako 80.000 sinadurak, ondoren Foro Sozialak nafar eta Gasteizko Parlamentuetan entregatu dituenak. Aipatu beharra dago baita ere Euskal Herriko instituzio desberdinetan urrunketagaz bukatzeko eta preso gaixoak askatzeko onartutako ekimen desberdinak".
Baina bitartean, azpimarratu dutenez, "euskal gizartea ez da normaltasunean bizi, dispertsio-politikaren arduradunek eskubide hori debekatu diotelako eta mendekuan oinarritzen den politika abian mantentzen dutelako". Salatu dute "uda honetan ere, presoen senide eta gertukoek ez dutela oporrik izan: espetxeetako bidaiak egitera murgilduta daude oraingoz. Horregatik, mobilizazioa ezinbestekoa da eta horregatik hain justu hondartzetan izango gara". Izan ere, "isilarazitako egoera bati ahotsa eman" gura diote.
Ekimenaren kartela
