Jendartea  Leioa  Sopela 2017-08-07 17:00

Gazte bat atxilotu dute sakelako telefonoa mehatxuz lapurtzea egotzita

Ertzaintzak 16 urteko gizonezko bat atxilotu zuen zapatu arrastian, Leioan, larderia erabilita egindako lapurreta-delitua leporatuta. Ustez, atxilotutako adin txikikoak laban bategaz mehatxu egin zion beste adin txikiko bati, Sopelan, sakelako telefonoa lapurtzeko.

Joan den barikuan, Getxoko Ertzaintzak jasotako salaketa baten arabera, gizonezko bik adin txikiko biri lapurtu zieten, Sopelako Errekagane plazan. Salaketan adierazitakoaren arabera, lapurretako batek labana erakutsi zien gazte biei, eta zeroaten baliozko dena eman ziezaieten agindu zien. Gazteetako batek telefono mugikorra eman zienean, lapurrak eta haren lagunak lasterka ihes egin zuten bertatik.

Ertzaintzak gertatutakoaren berri izan zuenean, ikerketa abian ipini, eta ustezko lapurraren nortasuna jakin zuen. Une horretan, agenteek ustezko lapurra aurkitzeari ekin zioten. Zapatuan, arrastiko lehen orduan aurkitu zuten Leioako metro-geltokian. Ertzainek susmagarria behar bezala identifikatu eta bidezko egiaztapenak egin ostean, larderia erabilita egindako lapurreta-delituaren akusaziopean atxilotu zuten. Polizia-egoitzara eroan zuten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa