Ikus-entzule berriei bideratutako ikus-entzunezko formatu berriak sortzeko laborategia da Next Station. Hala, plataformak deialdi bat egin du euskal sortzaileak erakartzeko. Euskarazko lehen serie digitala ekoiztea da asmoa, azken-azkeneko teknologia erabiliz gainera, 4K ultra-bereizmena. Proiektu horren bidez, seriearen denboraldi oso bat filmatzea da asmoa, sei kapitulu denera. Lehiaketa horren bidez "formatu original eta berritzaileak" bilatzen dituzte antolatzaileek, horregatik ideia denakdira ongietorriak eta edonork har dezake parte; profesionala izan ala ez.
Aurkeztuko diren proiektu denetatik hiru aukeratuko dituzte beka baten bidez prestakuntza jasotzeko, eta azkenik, horietako batek lortuko du ametsa bete eta serie bat filmatzea.
Luis Berasategik, BBFko zuzendariak eta MIK (Mondragon Innovation & Knowledge) zentroko ikertzaileak, sortu du Next Station plataformarako lan-metodologia. Prestakuntza-ibilbide berritzaile horren bidez hiru sortzaile horiek aukera izango dute beren proposamenak ekoizpen arineko dinamikekin fintzeko, ideiaren bilakaera sare sozialetan testatzen duten bitartean.
Ikus-entzunezko laborategi horren asmoa da sortzaileei laguntzea prototipoak egiten, ikus-entzunezko formatuak lantzen, narrazio-molde eta teknologia berriakaz esperimentatzen eta ideia berritzaileak nazioartera eroaten. Ondoren, hautatuek aukera izango dute Next Station plataformaren kalitate-zigiluagaz nazioarteko merkatuetara jotzeko, bideragarritasun ekonomikoaren eta berrikuntzaren berme baita zigilu hori.
Nola parte hartu
Ideiak bideo-formatuan bidali beharra dago; selfie moduan edo bideo narratibo batean bidal daitezke. Gehienez ere, minutu batekoa izango da bideoa eta proiektuaren garapena eta ideiaren berezitasuna azalduko dira bertan.
Interesdunek abenduaren 15a baino lehen bidali beharko dituzte bideoak, Next Station plataformaren Facebookeko profilera.
Aurkeztutako proiektu horietatik hogei aukeratuko dira; hautaketa bi modutara egingo da: batetik, aditu talde batek erabakiko du euren ustez zein diren ideia onenak, eta, bestetik, jendeak gizarte-sareen bidez eman ahal izango du bere botoa. Ondoren, hiru sortzaile hautatuko dira, beka baten bidez prestakuntza jasotzeko. Mondragon Unibertsitateak Bilbon duen egoitzan, BBF eraikinean (Bizkaiko Berrikuntza Faktoria) eta Donostiako Tabakalera Kultura Garaikidearen Nazioarteko Zentroan jasoko dute prestakuntza hori. Hiru horietako bat izango da lehiaketaren irabazlea, bere seriearen denboraldi oso bat grabatuko duena.
ETB, Netflix edota HBO
2018an ekoitzi eta filmatuko da seriea; ETBn emango da. Horretaz gainera, nazioarteko hainbat merkatutara bideratuko da VOD plataformei saltzeko, hala nola Netflixi eta HBOri.
Next Station plataformaren eragileak
Plataforma publiko-pribatu hori talentu berrien aldedabil apustu egiten, eta komunikazio- eta informazio-teknologien goraldiagaz puri-purian diren ikus-entzunezko formatuak dabil bultzatzen. Proiektu horretan hainbat eragile dabiltza lanean: EIKEN (Ikus-entzunezkoen Euskal Klusterra), EITB eta hiru euskal ekoizpen-etxe (Media Attack, Develop Hub eta J.O.K. films). Laguntzaileak, berriz, Bizkaiko Foru Aldundia, Gipuzkoako Foru Aldundia, Euskaltel, Eusko Jaurlaritza eta Mondragon Unibertsitatea dira.
EITB eta EIKEN gidari direla, Euskal Herriko ikus-entzunezkoen sektoreko hiru gazte ekintzaile elkartu dira formatu berrien laborategi hau martxan jartzeko: Diego Urruchi, Media Attack transmedia-agentziaren sortzailea; Elbio A. Nielsen, Develop HUB komunitatearen sortzailea eta presidentea (ikus-entzunezko proiektu berritzaileak bultzatzen ditu komunitate horrek eta sektoreko hainbat profesional biltzea lortu du arrakasta handiz) eta berrikuntza masterraren koordinatzailea; eta Jokin Etcheverria, J.O.K films etxearen sortzailea, eta Pirinioen bi aldeetako hainbat mediotan zinema-ekoizlea.