Uribe Kosta eskualdera ura ekartzen duen hodia Mungialdera doanagaz lotzeko balioko du egitasmoak. Horretarako, Sopela eta Mungia batuko ditu tutu berri batek, Gatikatik igaroz. Daborduko 2014an egin zuten Sopela eta Butroe arteko zatia; bost milioi euroko kostuagaz. Orain, zortzi kilometroko hodia ipiniz luzatuko dute orduan egindako zatia, Mungiako Zabalondo poligonora heltzeko.
Lanen lehenengo zatia bost kilometroko tutua ipintzea izango da, Butroetik Mungiarako bidean dagoen ur-biltegiagaz lotzeko. Fase hori urteko bigarren hiruhilekoan abiaraziko dute, eta zazpi milioi euro baino gehiagoko aurrekontua dauka. Obra horiek amaitzeko epeari dagokionez, urtebete eta lau hilabeteko iraupena izatea aurreikusi dute. Bestalde, proiektuaren bigarren fasea urteko hirugarren hiruhilekoan hasiko dute eta 2020 baino lehen egon beharko du amaituta. Lan horien barruan, hiru kilometroko hodia ipiniko dute Butroe eta Mungia artean dagoen ur-biltegia Zabalondoko poligonoagaz lotzeko. Egitasmoaren bigarren zati horrek 4,5 milioi euroko aurrekontua izango du.
Aspadiko arazoa konpontzen. Eskuinaldea hornitzen duen hodi nagusia Arrigorriagako Goiko Bentatik ateratzen da; zehazkiago, edateko ura tratatzeko plantatik. Artxandatik igaro ostean, Leioako Kurkudi inguruko biltegira heltzen da. Handik abiatzen da Gorlizerako tutua. Hala ere, aipatutako udalerri denek "ez daukate guztiz" ziurtatuta ur-edangarriaren horniketa, Bilbao Bizkaia Ur Partzuergoaren kudeatzailea den Pedro Barreirok aitortu duenez. Beraren berbetan, "larrialdiren bat egotekotan edo konponketa-lanen bat egin behar izatekotan, gertuko erregulazio-biltegien menpe egon ohi dira. Horiek 24 ordu baino gutxiagorako ura berma dezakete. Beraz, egun bat baino gehiago irauten duen matxura bat egotekotan, ur barik gera daitezke udalerri horietako biztanleak". Arazo hori konponduko ei dute laster abiaraziko dituzten lanakaz.