Behin betiko taldea dauka daborduko Francisco Pla zuzendariak, 12 txirrindulariakaz: Olatz Agorria, Maialen Aramendia, Esther Cañete, Bea Gómez, Ziortza Isasi, Enara López, Sara Martín, Maria Martins, Mireia Muñoz, Sofía Rodríguez, Soraia Silva eta Ariadna Trías. Maria Martins eta Soraia Silva izan dira azken fitxaketak, Portugalgo pista-txapelduna eta txapeldunordea, hurrenez hurren.
Txirrindulariek kuartel nagusia ipini dute Leioako Askartza ikastetxeko Atalaia egoitzan. Bertan antolatu dituzte berbaldiak, egin dituzte entrenamenduak eta bertatik mugitu dira Sopelaraino, udaletxean agerraldia egiteko. Ekitaldi horretan izan ziren hamabi txirrindulariak, María Sonsoles Fernández eta Miguel Echeverría, Telxius enpresa-babesleko kideak; Gontzal Hermosilla, Sopelako alkatea; eta Guillermo Vio eta Mikel Tapia zinegotziak; besteak beste.
Movistarren aurkako lehia
Taldeak otsailaren 22an hasiko du denboraldia, Setmana Ciclista Valenciana lau etapako biran. Bertan, beste 29 talderen aurka lehiatuko dira Sopelako txirrindulariak. Arerio nagusiak izango dira Cervelo Bigla talde daniarra eta Canyon alemana (laugarren eta bosgarren, UCI sailkapenean), Ane Santestebanen Alé Cipollini taldea (bederatzigarren) eta Akitaniako FDJ eskuadra (hamargarren). Baina arreta isiotuko du bereziki Sopela Women’s Team (46.), Movistar (25.) eta Bizkaia-Durango-Euskadi-Murias (31.) taldeen arteko lehian. Lehenengo aldia izango da Sopelak aurrean izango dituena Lointeketik Movistarrera alde egindako Eider Merino, Alicia González, Gloria Rodríguez eta Alba Teruel.
Valentziako probaren ondoren, Sopelakoak Otxandion estreinatuko dira euskal errepideetan, martxoaren 3an, Euskaldun Txapelketako lehenengo proban. Ohi legez, Ugeraga txirrindularitza-klubak antolatuko ditu txapelketa horretako proba bi: Larrabasterrakoa, maiatzaren 12an, eta Sopelakoa, uztailaren 15ean. Aurten taldeak ez du Belgikako klasikak korrituko eta udarako utziko ditu nazioarteko probak. Bitartean, Euskaldun Txapelketaz gainera, Espainiako Kopan ere lehiatuko da, besteak beste.